Long weekend 只過咗2/3，不過我個廚房已經多咗3樣野...
5月28日
英國唔興依種保溫水煲，雖然中式超市都有類似款式，不過價錢貴且大部份係大陸雜嘜牌子!
雖然已經有個象印，但有用開保溫水煲既人都應該知道煲水速度超慢!
有時煲湯滾湯煲粥...有依種快速電水煲就會方便得多嘞!!
所以對我來講保溫 + 高速電水煲，就好似有部DSLR，都應該要有部方便攜帶既DC -兩者都係必需既!
上面依個Tefal 為T家服務咗5年，上星期突然昏迷啪制完全無反應!
我嘗試換過插頭個fuse 急救佢，結果都係搶救無效
，正式宣佈佢賣咗鹹鴨蛋......咁一雞死當然要有一雞鳴架啦! 
經過我連日行勻各大超市 + 電器舖，逐隻電水煲攞上手試吓重量 + 手感......
好奇怪...依個Philips 喺同一間電器舖既官網online 買，竟然比親身到店買平足足£6! 而且online 買仲係免費送貨喎!!
我係一個精打細算既慳家賢妻(自稱!
)，當然係寧願等2日慳返£6 online 買啦! Philips 電水煲朝早送來收貨後無耐......睇電視廣告有間電器舖，有款Kenwood 食物處理器竟然減到半價!
我即時覺得心癢難熬~~~~~~~~~
平時用佢來chop 蒜蓉; 整菜肉雲吞時又用來chop 白菜 + 莞茜蔥; 最近仲用佢來整過雞肝醬......
不過佢實在太太太mini 嘞! 一包白菜要分開好多次先chop 得哂; 連整細細兜雞肝醬都要分開2次來打雞肝......
如果有一部食物處理器就會快手好多嘞!之前已有打算買~ 咁啱比我睇到電視廣告; 再咁啱屋企附近又有電視廣告果間電器舖喎......
於是咋咋淋打去屋企附近分店問吓有無現貨!
半價喎! 我幫Mr.T 慳返咗一半錢喎!!
我真係覺得自己好賢慧!! 呵呵~~~~~
5月29日
嗱!
唔好噓我住......無錯~ 我都記得3個月前我買完隻Cassis 講過金盆洗手唔再買煲~
不過之後我發現，平時我用來煲粥果個24cm 易潔煲比我刮花咗，睇個勢下一步易潔層一定會甩出來......而証據已經比我揼鬼咗嘞!
同時我又發現 - 屋企其他既煲用來煲粥的話都太大......
(因為Mr.T 唔嗜粥，得我一個食粥嘛!
)
同場加映.......
(今日仍然好鬼大風!!! 
)
有用就買啦!
回覆刪除[版主回覆05/30/2011 16:40:00]當然係有用先買啦! 無用買來咪盞阻訂......
我向 ｍｅｌｂ 都好少見 保溫水煲．．． 如果有都係大陸架．．．
回覆刪除都唔知仲咩呢度 ｄ 人唔用保溫水煲 ．．． 我都有一個高速電水煲．．．
因為我每一朝都要飲杯暖水同埋有時煲湯／公仔麵有個高速電水煲係方便好多架．．．
個 ｋｅｎｗｏｏｄ mini chopper 好似幾好咁 ｗｏｏ．．．
我地 ｋｅｎｗｏｏｄ 好少有特價．． 有都係最多 ２０％ ｏｆｆ．．．
個袋幾好睇 ｗｏｏｏ．．！！
[版主回覆05/30/2011 16:39:00]係啦~ 唔知點解洋人唔興用依種保溫水煲既呢? 中超又專賣唔知乜鬼牌子既大陸貨......大佬要長時間插住插蘇架嘛，我真係對果d牌子無咩信心!
見過倫敦Japan Centre 家品部有得賣，不過緊係超級驚人貴啦!! 唯有自己喺香港買返來~
不過高速水煲都係必需既! 尤其淥公仔麵!
果個mini chopper 用來chop 少量材料真係唔錯架! 不過要整多少少份量既話就唔夠咯~
今次唔係Kenwood 全線減價，只係依個model 食物處理器啱啱出咗一個新型號，所以依部咪減到半價囉!
個袋都幾好用，放到好多野又唔變型!
online sales 唔駛俾舖租同俾SALES 人工嘛
回覆刪除[版主回覆05/30/2011 16:32:00]我當然知道online 唔洗人工舖租啦，我唸我online shopping 應該唔會少過你!
我之所以奇怪係一來係同一間店; 二來online shopping 通常會收delivery~ 英國普遍貨品要超過£50先會免費送貨，但我部機好平!
隻象所煲同我地一樣..5年前買黎諗住for騫寶寶沖奶用...like佢有60c水溫..雖然真係煲幾耐下水..不過真係好耐用...抵
回覆刪除[版主回覆05/30/2011 16:29:00]其實果日妳upload 妳老公張相，我都好似見到妳個象印呀! 不過唔知係咪一樣型號囉~
我覺得依款好好用呀! 容量又大~
V女 果然好醒目 有格價先入貨 咁online又真係平好多 !!!
回覆刪除[版主回覆05/30/2011 16:27:00]其實係online 果間係同一間店來架! 只係我習慣親身去店前上網research 每個型號詳細資料 (有時店未必齊貨架嘛!)，網上揀啱睇啱先去買囉~ 就係咁比我發現online 平過店!
嘩!!!如果香港都有半價就好喇
回覆刪除[版主回覆05/30/2011 16:25:00]因為依個食物處理器，啱啱出咗個新型號，所以依個就減到半價嘞!
妳扮名媛都好似喎 ,個袋又真係幾大!
回覆刪除[版主回覆05/30/2011 17:41:00]咁我似唔似賢妻呀? 我想做一個"扮名媛"既賢妻啊!
個袋真係放到好多野! 啱哂我~
妳梗係一個賢妻啦
回覆刪除[版主回覆05/30/2011 18:23:00]haahaa~~~ thanks Andrea!
我都記得妳話唔買煲o架! 不過見到心頭好又點知唔買呢!
回覆刪除[版主回覆05/30/2011 21:03:00]算唔上心頭好既，咪又係煲一隻! 但人地真係要一隻煲來煲粥嘛!
你唔使一再強調你好賢喎 爭係識煮咁多嘢我已經覺得你超賢啦 個袋你拎得好睇喎
回覆刪除[版主回覆05/30/2011 22:02:00]我怕大家忘記咗依篇既重點 - "我好賢慧"嘛!
個袋幾好大，因為夠哂大! 乜野求其揼入去都得!!
賢妻Mrs.T, 真係點睇你都係屬於賢內助 + 高貴名媛o個類啦!! 所以妳都唔駛扮呀!妳跟本就係啦!!我一路睇你blog 一陣子都濃濃咁Feel到啦!!
回覆刪除功欲善其事 必先利其器, 你仲可以用半價的價錢買到~~~~真係回報率超高的投資~~~所以又再次證明你賢妻呢個名真係唔係浪得虛名!
[版主回覆05/31/2011 17:51:00]哈哈~~~~ Thanks 塔羅女神!
賢妻我自認架~ 不過名媛我就唔係嘞! 我只係想得閒"扮"吓名媛，唔想做真正名媛喎.....因為我鍾意執平貨嘛! 妳曾幾何時會見到有名媛買平貨架?
日本牌子電器真係耐用好多，我下次返去都要帶個熱水器返英國
回覆刪除[版主回覆05/31/2011 17:48:00]記住要手提啊! 我有朋友入喼寄倉，返到來個水煲比人掟到凹哂，插制都唔著成個報銷!
ahahahha cool pic of you with the bag! :D Lovely! I love and trust Philips too. :) My hubby doesn't like congee either. lol But I love it! :)
回覆刪除[版主回覆05/31/2011 17:46:00]thanks Stella! it really is a good bag, love it~
Philips might not the top brand for kitchen appliances but at least it's reliable!
i think maybe the majority of men dont like congee!!??
今晚hk都 好鬼大風
回覆刪除[版主回覆05/31/2011 17:39:00]我依邊連續大風咗好多日嘞......
好賢 Veron, 完全同意你好賢，睇得出！我常說只看事實呢！ 象印係唔係好出名？真係行得呢D地方少，好少睇水煲，我只係識PANASONIC呢類，印象中在韓國酒店見過一次象印呢！ 謝謝回覆！
回覆刪除[版主回覆05/31/2011 17:38:00]象印既廚房家電 + 保溫產品係幾出名架，而且品質非常好，小妹中學時代帶飯都係用象印既保溫飯壺架!
Panasonic 當然係好野啦! 佢地產品種類比較廣泛，上至電視電腦相機音響器材，下至小型廚房家電都有~ 不過佢地 大部份產品都好貴啊~ 但貴得來都算物有所值既!
但係我早排係英國既ONLINE 公司買左個GPS SYSTEM 英國DELIVERY到澳洲都唔駛SHIPPING WOR 舊野仲要唔過50 GBP
回覆刪除[版主回覆05/31/2011 07:49:00]我有話過所有online shop 都一定要過£50 先免delivery 嗎?
巧合的我早前有是比一個自己認定合理的藉口買了一個 27cm oval 既staub 呢!
回覆刪除[版主回覆05/31/2011 17:28:00]咁妳比咗個咩藉口自己呀?
我部panasonic保溫水煲都係海運寄過黎再自己換插頭㗎, 唔想買雜嘜國貨, 鬼佬版全部都係一大座好似飯堂啲工業用保溫水煲咁, 放屋企真係醜死鬼, 仲要勁阻地方啦 之前都想買food processor啊, 但最後買左有mini版chopper配件嘅stick blender, 所以而家又忍住無買, 睇吓幾時忍無可忍又遇上大減價先入手囉
回覆刪除[版主回覆05/31/2011 17:09:00]我個象印係幾年前同老公一齊返香港回程時手提攞過來架! 我怕寄空郵或入倉會比人掟壞，之前有朋友就係放行李喼入咗倉，返到來個水煲凹咗 + 插制都唔著!
mini chopper 其實好好用 + 好多用途既，不過若要整多少少份量就要食物處理器先搞得掂!
掃咗咁多新貨, 又係時候煮多D好餸比Mr. T啦...
回覆刪除[版主回覆05/31/2011 18:07:00]掃咗咁多新貨......其實第一時間係應該安排一個好位置去安置佢地!
其實掃到咁多好野 最有著數果個就係Mr.T啦 佢又有好多美食啦
回覆刪除[版主回覆06/01/2011 01:11:00]不過喺Mr.T 未有著數之前，佢已經付出咗代價 - 幫我比錢!
我個水煲成80歐仲唔保溫既﹗亞超D煲我又唔想買~ 底部電線可以調較長短捲埋 -- 我個煮蛋機都係﹐不過好易污糟~ LC 煲我冇刮花﹐不過我係佢熱時倒凍水﹐即刻玩完﹗
回覆刪除[版主回覆06/01/2011 17:48:00]妳果隻係咪又係依種高速Kettle? 洋人國家大都係得依種水煲架咋~
我之前個Tefal 電線無得捲埋，我都唔知容易污糟呢.......
我唸LC 煲應該好難會刮花! 我之前刮花咗果個係易潔煲來架!
haha ! 未就係我家得一個20cm圓型的 , 太細個只合適用來做煲仔菜or 煲仔飯! 而且我又無橢圓型既煲, 27cm容量大D可以用來煲湯, 如果炆成隻雞or鴨仲好襯囉!還有呀 , 果時碰正減價 , 唔買會好對唔住自己架!總之就藉口多多呢!
回覆刪除[版主回覆06/01/2011 17:45:00]我炆餸用22cm 啱啱好~ (不過唔係LC，係另一法國牌子Chasseur!)
以我所知就算係同size，Staub 既容量都係細過LC既，我啱啱買既27cm oval 極其量只可以用來炆到雞仔，全鴨就算係鴨仔都應該放唔落喎! 我炆鴨要用31cm oval~
依個weekend一次滿足哂自己,一定好爽啦 名媛V...妳去邊度high tea呀?
回覆刪除[版主回覆06/01/2011 17:40:00]shopping 緊係爽啦! 不過今個weekend 一次過買哂暫時想要既野，而家個wish list 有空缺，有少少失落感啊!
high tea is not my cup of tea!
I have the same Zojirushi hot water pot! They sell it here in NYC :)
回覆刪除[版主回覆06/02/2011 21:34:00]
i guess there are many japanese in NYC!
i can find it in London as well, there is a Japan Centre in London. but it's very expensive~
其實個27cm買回來都未試過炆整隻鴨or 雞 , 所以還未知可唔可以容納到 , 不過V女好多謝妳給我提示 , 未就係如果27cm真的放不下 , 咁我未又有藉口給自己多買一個 31cm呢!
回覆刪除[版主回覆06/03/2011 09:17:00]嘻嘻~~~ 幫妳唸咗個"充份理由"嘞!
第一次黎你個blog, 發覺你同你'honey'好sweet呀, 本來我想買staub 27cm oval , 咁啱而家永安百貨又有呢個款特價, $1699加送磁石木煲墊, 但係見到你話另外一隻鐵鍋牌子chasseur, 都唔錯, 價錢又平過LC/staub, 而香港代理係我公司附近, 所以今天去睇過, oval而係黑色塗層只有27cm($10xx)和 35cm, 如果琺瑯白色塗層的就有很多size可以選擇, 我想買黎浸雞, 你話唔係咁夠大用黎炆雞/鴨, 所以想買29cm, 咁只有白色珐瑯塗層才有, 正考慮中, sales話黑色塗層可以抵受高溫過白色琺瑯的, 對嗎 ?
回覆刪除[版主回覆06/25/2011 00:07:00]妳好Piggy豬~
我個人覺得27cm 用來浸雞都OK，不過浸鴨就應該唔夠大嘞! 29cm 我都覺得未必夠，所以我買咗隻31cm 用來炆雞鴨! (不過可能係我依度d鴨大隻..... )
我都覺得黑色可以抵受高溫多過白色 - 至少黑色可以乾燒，不過白色琺瑯層乾燒就會爆裂(我試過!) 但若妳買來炆雞鴨，叫得做炆都係有汁架啦，咁白色我覺得都無問題!
其實我真係好鍾意Chasseur，同LC一樣咁好用但係平咁多! 可惜我依度而家買唔到現貨.......